ಹೊಸದಿಲ್ಲಿ : ಎಸ್ಐಆರ್ ಪ್ರಕ್ರಿಯೆ ಮುಗಿದಿನ ರಾಜ್ಯಡ್ ಹೆಚ್ಚುವರಿ ಎಸ್ಐಆರ್ ಘೋಷಣೆನ್ ಚುನಾವಣೆ ಆಯೋಗ ದೆತ್ತ್ ಪಾಡ್ದ್ಂಡ್.
ಅಂಚಾದ್ ನನ ಪೊಸ ಮತದಾರೆರ್ ಫಾರ್ಮ್ ನಂ. 6 ಕೊರುಂಡ ಯಾವು. ಪರತ್ತ್ ಎಸ್ಐಆರ್ ದಾಖಲೆ ಸಹಿತ ಮ್ಯಾಪಿಂಗ್ ವಿವರ ಕೊರೊಡುಂದಿಜ್ಜಿ. ಆಂಡ ಎಸ್ಐಆರ್ ಮುಗಿಯಂದಿನ ರಾಜ್ಯಡ್ ಈ ನಿಯಮ ಮುಂದುವರಿಯುಂಡು ಪಂದ್ ಚುನಾವಣಾ ಆಯೋಗ ತೆರಿಪಾದ್ಂಡ್.
ಧರ್ಮಸ್ಥಳ : ಆರೋಗ್ಯ ರಕ್ಷಣೆಗ್ ಭಜನೆ ಅತಿ ಮುಖ್ಯ ಸಾದಿ. ಬದ್‌ಕ್‌ದ ಸುಗಮದ ಸಾದಿಯೇ ಭಜನೆ. ಆರೋಗ್ಯವಂತ ಶರೀರ ಆತ್ಮದ ಅರಮನೆ” ಪಂದ್ ರಾಜ್ಯ ಜನಜಾಗೃತಿ ವೇದಿಕೆದ ಪ್ರಾದೇಶಿಕ ನಿರ್ದೇಶಕ ವಿವೇಕ್ ಪಾಯಸ್ ತೆರಿಪಾಯೆರ್.
ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಭಜನಾ ಪರಿಷತ್ ವತಿರ್ದ್ ಸೆ.29 ಅಂಗಾರೆ ನಡತಿನ 28ನೇ ವರ್ಷದ ಭಜನಾ ಕಮ್ಮಟದ 2 ದಿನತ್ತ ಶಿಬಿರದ ಉಪನ್ಯಾಸಡ್ ಆರ್ ಪಾತೆರಿಯೆರ್.
ಭಜನೆರ್ದ್ ಸಾಮಾಜಿಕ ಪರಿವರ್ತನೆ, ಕೌಟುಂಬಿಕ ಸಾಮರಸ್ಯ ಬೊಕ್ಕ ಎಡ್ಡೆ ನಡತೆ ಸೃಷ್ಟಿಯಾದ್ ಸಮಾಜಡ್ ಆಪಿನ ಸಾಮಾಜಿಕ ಸಮಸ್ಯೆಲು ದೂರ ಆಪುಂಡು. ಕತ್ತಲೆನ್ ದೂರ ಮಲ್ತ್‌ದ್ ಬೊಲ್ಪುನು ಕೊರ್ಪಿನಲ್ಪ ಭಜನೆ ಪ್ರಮುಖ ಪಾತ್ರ ವಹಿಸಾವುಂಡು ಪಂದ್ ಪಂಡೆರ್.
ವರ್ಣಜಾಗೃತಿ, ಮದ್ಯ ವರ್ಜನ ಶಿಬಿರ ಬೊಕ್ಕ ಭಜನಾ ಕಮ್ಮಟ ಇಂಚಿನ ಕೆಲವು ಯೋಜನೆದ ಮೂಲಕ ಪೂಜ್ಯ ಹೆಗ್ಗಡೆ ದಂಪತಿಲು ಸಾರ ಸಾರ ಜನಕ್ಲೆನ ಪಾಲ್‌ಗ್ ನಿರೆಲಾದ್ ಮಾರ್ಗದರ್ಶನ ಕೊರೊಂದುಲ್ಲೆರ್ ಪಂದ್ ಆರ್ ಪಂಡೆರ್.
ಈ ಸಂದರ್ಭಡ್ ಭಜನಾ ಕಮ್ಮಟದ ಮುಖ್ಯ ಸಂಚಾಲಕೆರ್ ಸುಬ್ರಹ್ಮಣ್ಯ ಪ್ರಸಾದ್, ಭಜನಾ ಕಮಟ ಪರಿಷತ್ ಸದಸ್ಯೆರ್ ಬೊಕ್ಕ ಶಿಬಿರಾರ್ಥಿಲು ಇತ್ತೆರ್.
ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಭಜನಾ ಪರಿಷತ್ ವತಿರ್ದ್ ಆಯೋಜನೆ ಮಲ್ದಿನ 28ನೇ ವರ್ಷದ ಭಜನಾ ಕಮ್ಮಟದ 2 ನೇ ದಿನತ್ತ ಶಿಬಿರಡ್ ಸಂಗೀತ ವಿದೂಷಿ ಉಷಾ ಹೆಬ್ಬಾರ್, ಮಣಿಪಾಲ ಭಜನಾ ತರಬೇತಿ ಕೊರಿಯೆರ್. ಈ ಸಂದರ್ಭಡ್ ಭಜನಾ ಕಮ್ಮಟ ಪರಿಷತ್ ಅಧ್ಯಕ್ಷೆರ್ ಡಾ.ಡಿ. ವೀರೇಂದ್ರ ಹೆಗ್ಗಡೆರ್, ಉಪಾಧ್ಯಕ್ಷೆರ್ ಡಾ॥ ಹೇಮಾವತಿ ಅಮ್ಮ, ಸುಪ್ರಿಯಾ ಹರ್ಷೇಂದ್ರ ಕುಮಾರ್ ಬೊಕ್ಕ ಐಶ್ವರ್ಯ ನಿಶ್ಚಲ್ ಜೈನ್ ಇತ್ತೆರ್.
ಮುಲ್ಕಿ : ಕರಿನ 12 ವರ್ಷರ್ದ್ ಅವೆತೋ ಸರ್ತಿ ಬಾರಿ ದಸ್ತಗಿರಿ ವಾರಂಟ್, ಪ್ರೊಕ್ಲಮೇಷನ್ ಇತ್ತ್ಂಡಲಾ ನ್ಯಾಯಂತಡೆಗ್ ಹಾಜರಾವಂದೆ ದೆಂಗುದ್ ಕುಲ್ದಿನ ಆರೋಪಿನ್ ಮುಲ್ಕಿ ಪೊಲೀಸೆರ್ ಮುಲ್ಕಿ ಲಿಂಗಪ್ಪಯ್ಯ ಕಾಡ್ ಡ್ ಕೈದ್ ಮಲ್ತ್ ದ್ ನ್ಯಾಯಂತಡೆಗ್ ಲೆತೊಂದು ಪೋತೆರ್. ನ್ಯಾಯಂತಡೆ ಆರೋಪಿಗ್ ನ್ಯಾಯಾಂಗ ಬಂದನ ಕೊರ್ತೆರ್.
ಆರೋಪಿನ್ ಮುಲ್ಕಿ ಕೈತಲ್ದ ಕೆಎಸ್ ರಾವ್ ನಗರ ಹನುಮಂತ ದೇವಸ್ಥಾನದ ದಲ್ಪದ ಸಂತೋಷ (33 ) ಪಂದ್ ತೆರಿದ್ ಬೈದುಂಡ್.
ಆರೋಪಿ ಸಂತೋಷ್ ಮುಲ್ಕಿ ಪೊಲೀಸ್ ಠಾಣೆ ಅ. ಕ್ರ 209/2014 ಕಲಂ 448, 354 IPC ಬೊಕ್ಕ ಬೆದ್ರದ ಹಿರಿಯ ಸಿಜೆ & ಜೆ. ಎಂ. ಎಫ್. ಸಿ ನ್ಯಾಯಾಲಯ, ಮೇರೆನ CC No 274/2023 ಪ್ರಕರಣಡ್ ಸುಮಾರ್ 12 ವರ್ಷರ್ದ್ ಮಾನ್ಯ ನ್ಯಾಯಂತಡೆಗ್ ಪೋವಂದೆ ದೆಂಗುದ್ ಕುಲ್ದು ಇತ್ತೆ ಪಂದ್ ಪೊಲೀಸ್ ತೆರಿಪಾದೆರ್.
ಕುಡ್ಲ : MRPL ಪ್ರದೇಶಡ್ ಬುಧವಾರ ಮಧ್ಯಾಹ್ನ 12.15 ಕ್ಕ್ ಭಾರಿ ಪ್ರಮಾಣ ಸ್ಫೋಟ ಆದ್ 9 ರ್ದ್‌ಲ ಎಚ್ಚ ಜನಕ್ಕ್ ಗಾಯ ಆತ್ಂಡ್ ಪಂದ್ ಪ್ರಾಥಮಿಕ ಹಂತಡ್ ತೆರಿದ್ ಬೈದ್ಂಡ್.
ಸ್ಫೋಟದ ರಭಸ್‌ಗ್ ಜೋಕಟ್ಟೆ ಗ್ರಾಮ ಪಂಚಾಯತ್ ಕಟ್ಟಡ ಬೊಕ್ಕ ಸುತ್ತಮುತ್ತಲ್‌ದ ಇಲ್ಲ್ ಬೊಕ್ಕ ಕಟ್ವಾಣಲು ಅದ್ರ್ದ್ಂಡ್.
ಈ ಜಾಗೆಗ್ ಜಿಲ್ಲಾಧಿಕಾರಿ ದರ್ಶನ್ ಬೊಕ್ಕ ಅಧಿಕಾರಿಲು ಕೂಡ್ಲೆ ಭೇಟಿ ಕೊರ್ದು ರಕ್ಷಣಾ ಕಾರ್ಯಗ್ ಮಾರ್ಗದರ್ಶನ ಕೊರೊಂದುಲ್ಲೆರ್. ಸಂಸದೆರ್ ಬ್ರಿಜೇಶ್ ಚೌಟ ಬೆಲ್ತಂಗಡಿದ ಕಾರ್ಯಕ್ರಮ ರದ್ದ್ ಮಲ್ತ್‌ದ್ ವಾಪಸ್ ಬರೊಂದುಲ್ಲೆರ್.
ಸ್ಫೋಟದ ರಭಸ್‌ಡ್ ಜೋಕಟ್ಟೆ ಕೈತಲ್ದ ಇಲ್ಲದಕ್ಲೆನ ಕಂಡಿ ಬಾಕಿಲ್ ಅದ್ರ್ದ್ಂಡ್.ತೂತ್ತ ಪುಗೆ ಬಾನದಾತ್ ಎತ್ತರೊಗು ಪೋವೋಂದಿತ್ತ್‌ದ್ ಬೊಕ್ಕ ನಿಯಂತ್ರಣಗ್ ಬೈದ್ಂಡ್. ಅಗ್ನಿಶಾಮಕದಕುಲು,
ಅಧಿಕಾರಿಗಳು ಬೊಕ್ಕ ತುರ್ತು ಸೇವಾ ಸಿಬ್ಬಂದಿಲು ರಕ್ಷಣಾ ಕಾರ್ಯ ಮಲ್ತೊಂದುಲ್ಲೆರ್ ಪಂದ್ ಪ್ರಾಥಮಿಕ ವರದಿಡ್ ಗೊತ್ತಾತ್ಂಡ್.
ಕಾರ್ಲ : ದೋಸ್ತಿನಕ್ಲೆನ ಒಟ್ಟುಗು ಸುವರ್ಣ ತುದೆಕ್ಕ್ ನೀಂದರೆ ಪೋತಿನ ರಡ್ಡ್ ಜನ ಜವನೆರ್ ನೀರ್ ಪಾಲಾತಿನ ಘಟನೆ ಅಂಗಾರೆ ಮದ್ಯಾನ ಹಿರ್ಗಾನ ಗ್ರಾಮಡ್ ನಡತ್ಂಡ್. ಹಿರ್ಗಾನದ ಭರತ್ ಪೂಜಾರಿ (29) ಬೊಕ್ಕ ಹರ್ಷನ್ ಆಚಾರ್ಯ (23) ತೀರ್ ಪೋಯಿನಕುಲು ಪಂದ್ ಗೊತ್ತಾತ್ಂಡ್.
ಕೆಲಸೊಗು ರಜೆ ಇತ್ತಿನೆರ್ದಾವರ 5 ಜನ ದೋಸ್ತಿಯಲ್ಲು ಮಂಗಿಲಾರು ಮುಕೇನ 2 ಕಿ.ಮೀ. ದೂರದ ಸಾದಿಡ್ ನಡತೊಂದು ಪೋದು ನೀರ್‌ಗ್ ಜತ್ತ್‌ದ್ ಗುಂಡಿ ಗೊತ್ತಾವಂದೆ ಭರತ್ ಬೊಕ್ಕ ಹರ್ಷನ್ ಮುರ್ಕುದೆರ್ ಪಂದ್ ತೆರಿದ್ ಬೈದ್ಂಡ್.
ಅಗ್ನಿಶಾಮಕ ದಳದ ಸಿಬ್ಬಂದಿ ಮೂಜಿ ಕಿ.ಮೀ. ನಡತ್ ಪೋದು ಸ್ಥಳೀಯೆರ್‌ನ ಸಹಕಾರೊಡು 3 ಗಂಟೆರ್ದ್‌ಲ ಹೆಚ್ಚ ಪೊರ್ತುಡು ಕಾರ್ಯಾಚರಣೆ ಮಲ್ತ್‌ದ್ ಪುನ ಮಿತ್ತ್ ದೈದೆರ್.
ಸುರತ್ಕಲ್: ಸುರತ್ಕಲ್ ಬಂಟರ ಸಂಘದ ಮಹಿಳಾ ವೇದಿಕೆ ವತಿರ್ದ್ ದಸರಾ ಬೊಕ್ಕ ದೀಪಾವಳಿ ಪರ್ಬದ ಪ್ರಯುಕ್ತ “ಸಿಂಧೂರ 2026” ಸೀರೆ, ಆಭರಣ ಬೊಕ್ಕ ವೈವಿಧ್ಯಮಯ ಉತ್ಪನ್ನದ ಮಾರಾಟ ಮೇಳ ಅ. 2 ರ್ದ್ 4 ತಾ. ಮುಟ್ಟ ಸುರತ್ಕಲ್ ನ ಬಂಟರ ಭವನಡ್ ನಡಪರೆ ಉಂಡು.
ಅ. 2 ಕಾಂಡೆ 10 ಗಂಟೆಗ್ ಮಾರಾಟ ಮೇಳನ್ ತುಳು ವರ್ಲ್ಡ್ ಫೌಂಡೇಶನ್, ಕಟೀಲು ನೆತ್ತ ಅಧ್ಯಕ್ಷೆರ್ ಭಾನುಮತಿ ಶೆಟ್ಟಿ ಕಕ್ವಗುತ್ತು ಉದಿಪನ ಮಲ್ಪುವೆರ್. ಅಧ್ಯಕ್ಷತೆನ್ ಸುರತ್ಕಲ್ ಬಂಟರ ಸಂಘದ ಮಹಿಳಾ ವೇದಿಕೆದ ಅಧ್ಯಕ್ಷೆ ಸರೋಜ ತಾರಾನಾಥ್‌ ಶೆಟ್ಟಿ ವಹಿಸರೆ ಉಲ್ಲೆರ್. ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಬಾಳ ಜಗನ್ನಾಥ ಶೆಟ್ಟಿ, ಮಹಿಳಾ ವೇದಿಕೆ ಸ್ಥಾಪಕಾಧ್ಯಕ್ಷೆ ಅಂಜನಾ ಮಂಜಯ್ಯ ಶೆಟ್ಟಿ ಉಪ್ಪುವೆರ್ ಪಂದ್ ಮಹಿಳಾ ವೇದಿಕೆದ ಕಾರ್ಯದರ್ಶಿ ರಾಜೇಶ್ವರಿ ಡಿ ಶೆಟ್ಟಿ ತೆರಿಪಾದೆರ್.
ಕುಡ್ಲ : ಬಿಜೆಪಿ ದಕ್ಷಿಣ ಕನ್ನಡ ಜಿಲ್ಲಾ ಶಿಕ್ಷಣ ಪ್ರಕೋಷ್ಟದ ಆರಂಭ ಬೊಕ್ಕ ಸುರುತ್ತ ಸಭೆ ಜಿಲ್ಲಾ ಬಿಜೆಪಿ ಕಚೇರಿಡ್ ಪಕ್ಷದ ಜಿಲ್ಲಾಧ್ಯಕ್ಷೆರ್ ಸತೀಶ್ ಕುಂಪಲ ಮೆರೆನ ಮಾರ್ಗದರ್ಶನಡ್ ನಡತ್ಂಡ್.
ಪೊಸ ಪದಾಧಿಕಾರಿಲೆನ್ ಜಿಲ್ಲಾಧ್ಯಕ್ಷೆರ್ ನೇಮಕ ಮಲ್ತ್‌ದ್ ಬೊಕ್ಕ ಪದಗ್ರಹಣ ನಡತ್ಂಡ್.
ಜಿಲ್ಲಾ ಸಂಚಾಲಕೆರಾದ್
ವಸಂತ ಮಂಜನಾಡಿ ,
ಸಹ ಸಂಚಾಲಕೆರಾದ್ ನಾರಾಯಣ ಗೌಡ ಬಂಟ್ವಾಳ , ಸುರೇಶ್ ಭಂಡಾರಿ ಬೆದ್ರ, ವಿನೀತ್ ನಾಯರ್ , ಮಂಗಳೂರು ಉತ್ತರ, ಸತ್ಯನಾರಾಯಣ ಭಟ್ , ಮಂಗಳೂರು ಸೌತ್, ಸುರೇಶ್ ಎಂ ಎಸ್ , ಬೆಳ್ತಂಗಡಿ, ಮನಮೋಹನ್ , ಸುಳ್ಯ., ರಾಜೇಂದ್ರ ಮಾಸ್ಟರ್ , ಪುತ್ತೂರು, ಎ ಕೆ ಬಾಬು , ಮಂಗಳೂರು ಸೌತ್ ವಸಂತ್ ರೈ ಬಿಕೆ , ಮಂಗಳೂರು ಮಂಡಲ ಸಂಚಾಲಕೆರಾದ್ ಅಧಿಕಾರ ಸ್ವೀಕಾರ ಮಲ್ತೆರ್.
ಈ ಸಭೆಟ್ಟ್ ರಾಜ್ಯಬಿಜೆಪಿ ಶಿಕ್ಷಣ ಸಹ ಸಂಚಾಲಕೆರ್ ಬೊಕ್ಕ ಬಿಜೆಪಿ ಸೇವಾಸಂಕಲ್ಪದ ಬದಲಾವಣೆದ ಕಥೆತ್ತ ರಾಜ್ಯ ಸಹ ಉಸ್ತುವಾರಿ ಎಂ ಜಿ ಭಟ್ ಕುಮಟಾ ಪಾಲ್ ಪಡೆದ್ ಪ್ರಕೋಷ್ಟದ ಜಿಲ್ಲಾ ಬೊಕ್ಕ ಮಂಡಲ ಮಟ್ಟದ ಸಮಿತಿದ ಬಗ್ಗೆ ಮಾರ್ಗದರ್ಶನ ಕೊರಿಯೆರ್.
ದಕ್ಷಿಣ ಕನ್ನಡ ಜಿಲ್ಲಾ ಬಿಜೆಪಿ ಪ್ರಕೋಷ್ಠಲೆನ ಸಂಯೋಜಕೆರಾಯಿನ ಸುಧೀರ್ ಶೆಟ್ಟಿ ಕಣ್ಣೂರು ಬೊಕ್ಕ ಕರ್ನಾಟಕ ರಾಜ್ಯ ಬಿಜೆಪಿ ಶಿಕ್ಷಣ ಪ್ರಕೋಷ್ಟದ ಸದಸ್ಯೆರ್ ಮುರಳಿ ಹೊಸಮಜಲು ಸಲಹೆ ಸೂಚನೆ ಕೊರಿಯೆರ್.
ಪ್ರಕೋಷ್ಠದ ಜಿಲ್ಲಾ ಸಂಚಾಲಕೆರ್ ವಸಂತಕುಮಾರ್ ಮಂಜನಾಡಿ ಸೊಲ್ಮೆ ಸಂದಾಯೆರ್.
ಮುಲ್ಕಿ:ಕರ್ನಾಟಕ ದಲಿತ ಸಂಘರ್ಷ ಸಮಿತಿ ಅಂಬೇಡ್ಕರ್ ವಾದ ಮುಲ್ಕಿ ತಾಲೂಕು ಶಾಖೆನ್ ಶ್ರೀ ಕೋರಬ್ಬು ದೈವಸ್ಥಾನದ ಅರ್ಚಕ ಸುಧಾಕರ ಗೇರುಕಟ್ಟೆ ಉಡಿಪನ ಮಲ್ತೆರ್.
ದಸಂಸ ಮೈಸೂರು ವಿಭಾಗೀಯ ಸಂಘಟನಾ ಸಂಚಾಲಕೆರ್ ಬಿ.ಕೆ.ವಸಂತ್ ಬೆಳ್ತಂಗಡಿ ಗುರ್ಕಾರ್ಮೆ ವೈಸೊಂದು ಪಾತೆರ್ದ್ ಶೋಷಿತ ಸಮುದಾಯಗ್ ಅನ್ಯಾಯ, ದೌರ್ಜನ್ಯ ಆನಗ ಸಂಘಟನೆ ಕಾನೂನಾತ್ಮಕವಾದ್ ಹೋರಾಟ ಮಲ್ತ್ ನ್ಯಾಯ ತಿಕ್ಕರೆ ಸಂಘಟನೆದ ಅಗತ್ಯ ಉಂಡು . ದಲಿತ ಸಮಾಜ ಶೈಕ್ಷಣಿಕ, ಸಾಮಾಜಿಕ, ಆರ್ಥಿಕ, ಧಾರ್ಮಿಕ ಸಾಧಕರಾವರೆ ಅಂಬೇಡ್ಕರ್ ತೋಜಾಯಿನ ಸಾದಿಡ್ ಪೋವೊಡು ಪಂಡೆರ್.
ಈ ಲೇಸ್ ಡ್ ಮಲ್ಲ ಬಿನ್ನೆರಾದ್ ಮಾಜೀ ಸೈನಿಕ ಸುಧಾಕರ ಗುತ್ತಕಾಡು, ದಲಿತ ಮುಖಂಡೆರ್ ಸಂಜೀವ ಅಂಚನ್, ಲೋಕೇಶ್ ಬಿ., ಶಂಕರ್ ಅಮೃತಾನಂದಮಯಿ ನಗರ, ಭಾಸ್ಕರ್ ಮಾಬೆನ್, ಪುರಂದರ ಕೆರೆಕಾಡು, ಸಚ್ಚಿದಾನಂದ ಗೇರುಕಟ್ಟೆ ಉಪಸ್ಥಿತರಿತ್ತೆರ್.
ಕುಮಾರ್ ಎಸ್.ಅಂಗರಗುಡ್ಡೆ ಎದ್ಕೊಂದು ಲೇಸ್ ಸುದಾರಿಕೆ ಮಲ್ತೆರ್ .
ಪೊಸ ದ ಸಂ ಸ ಅಂಬೇಡ್ಕರ್ ವಾದ ಮುಲ್ಕಿ ತಾಲೂಕು ಶಾಖೆ ಸಮಿತಿದ ಪದಾಧಿಕಾರಿಲು
ಸಂಚಾಲಕೆರ್ ಪುರಂದರ ಕೆರೆಕಾಡು, ಸಂಘಟನಾ ಸಂಚಾಲಕೆರ್ ಸಂಜೀವ ಅಂಚನ್, ಜಯ ಅಮೃತಾನಂದಮಯಿ ನಗರ, ಶ್ರೀಕುಮಾರ್ ಎಸ್.ಅಂಗರಗುಡ್ಡೆ, ಸಚ್ಚಿದಾನಂದ ಗೇರುಕಟ್ಟಿ, ಶಂಕರ್ ಕೆಎಸ್‌ರಾವ್ ನಗರ, ಭಾಸ್ಕರ ಮಾಬೆನ್ ಕಾರ್ನಾಡು.
ನಿರ್ವಹಣಾ ಸಮಿತಿ ಸದಸ್ಯೆರ್
ಜಗನ್ನಾಥ್ ಗೇರುಕಟ್ಟೆ, ಸುಧಾಕರ ಗುತ್ತಕಾಡು, ಮೋಹನ್ ಚಿತ್ರಾಪು, ವಿಜಯ ಕಾರ್ನಾಡು, ಸುಧಾಕರ ಗೇರುಕಟ್ಟೆ, ರಕ್ಷಣ್ ಕಾರ್ನಾಡು, ಶಯನ್ ಕೆಎಸ್‌ರಾವ್ ನಗರ,
ತಾಲೂಕು ಸಮಿತಿ ಸದಸ್ಯೆರ್
ಸತೀಶ್ ಅಮೃತಾನಂದಮಯಿ ನಗರ, ಗೋಪಾಲ ಅಮೃತಾನಂದಮಯಿ ನಗರ, ರಮೇಶ್ ಕಾರ್ನಾಡು, ಪ್ರಕಾಶ್ ಪೊಯ್ಯಾರು, ವಿಠಲ ಸಾಲ್ಯಾನ್ ಮುಲ್ಕಿ ರಮೇಶ್ ಜೆ.ಬಿ., ಸಂಜನಾ, ರೇಣುಕಾ ಪ್ರವೀಣ್ ಗೇರುಕಟ್ಟೆ, ಕೃಷ್ಣ ಅಮೃತನಂದಮಯಿ ನಗರ
ಕುಡ್ಲ: ಮಂಗಳೂರು ನಗರದ ಪರ್ಪಿನ ನೀರ್ ಸರಬರಾಜು ಬೊಕ್ಕ ಒಳಚರಂಡಿ ಮೂಲಸೌಕರ್ಯ ಮೇಲ್ದರ್ಜೆಗ್ ಏರಿಸಾವರೆ ದೆತೊಂದಿನ ಏಷ್ಯನ್ ಅಭಿವೃದ್ಧಿ ಬ್ಯಾಂಕ್‌ನಿಂದ (ಎಡಿಬಿ) ಸಾಲದ ಮೊತ್ತ ಇತ್ತೆ ಅಸಲು ಬೊಕ್ಕ ಬಡ್ಡಿ ಸೇರ್ದ್ ಬರೋಬ್ಬರಿ 1,375.17 ಕೋಟಿ ರೂ.ಗ್ ಏರ್ದ್ಂಡ್.
ಮಾಹಿತಿ ಹಕ್ಕು ಕಾಯ್ದೆ (ಆರ್‌ಟಿಐ) ಅಡಿಟ್ಟ್ ತಿಕಿನ ಮಾಹಿತಿ ಪ್ರಕಾರ, ಯೋಜನೆ ಅನುಷ್ಠಾನ ಸಂಸ್ಥೆ ‘ಕರ್ನಾಟಕ ನಗರ ಮೂಲಸೌಕರ್ಯ ಅಭಿವೃದ್ಧಿ ಮತ್ತು ಹಣಕಾಸು ನಿಗಮ’ಗ್ ಸುರುಕ್ಕು ಬಿಡುಗಡೆಯಾತಿನ ಅಸಲು 380.34 ಕೋಟಿ ರೂ. ಆಂಡ ಚಕ್ರಬಡ್ಡಿ ಮತ್ತು ಶೇ. 2.5 ದಂಡದ ಬಡ್ಡಿ ಸೇರ್ದ್ 2026ತ್ತ ಏಪ್ರಿಲ್ ಗ್ ಅಯಿತ್ತ ಮೊತ್ತ 1,375.17 ಕೋಟಿ ರೂ. ಆತ್ಂಡ್ .
ಸಾಲ ಸಂದಾವುನ ಅವಧಿ 2026ಕ್ಕೇ ಮುಗಿದ್ಂಡಲ ಮಹಾನಗರ ಪಾಲಿಕೆ ಇದಮುಟ್ಟಲ ಒಂಜಿ ಕಂತ್‌ಲ ಕಟ್ ದಿಜಿ ಪಂದ್ ತೆರಿದ್ ಬೈದ್ಂಡ್.
ಎಡಿಬಿ ಸಾಲಗ್ ಸಂಬಂಧಪಟಿನ ಎನ್‌ಜಿಒ ಟಾಸ್ಕ್ ಫೋರ್ಸ್ನ ಮಾಜಿ ಸಂಚಾಲಕೆರ್ ಹರ್ಷ ಡಿಸೋಜ ಪಾತೆರ್ದ್, “ಪಾಲಿಕೆ ಸಾಲದ ಒಂಜಿ ಕಂತ್‌ಲ ಕಟ್‌ದಿಜಿಡಲ ಚರಂಡಿ ಸೆಸ್ ಬೊಕ್ಕ ಬೇತೆ ತೆರಿಗೆದ ಸಂಗ್ರಹದ ದುಡ್ಡು ಓಡೆ ಪೋತುಂಡು ಪಂದ್ ಪ್ರಶ್ನೆ ಮಲ್ದೆರ್.
ಪಂಚದ್ರಾವಿಡ ಬಾಸೆಲೆಡ್ ಒಂಜಾಯಿನ ತುಳುಕ್ಕ್ ಇತ್ತೆ ಜಾಸ್ತಿ ಮಾನ್ಯತೆ ತಿಕ್ಕೊಂದುಂಡು. ಉಡುಪಿ, ದಕ್ಷಿಣ ಕನ್ನಡ ಜಿಲ್ಲೆಲೆನ್ ಸೇರಾವೊಂದು ದೇಶದ ಬೇತೆ ಬೇತೆ ಕೋಡಿಡ್ ತುಳು ಚಟುವಟಿಕೆಲು ನಡತೊಂದಿತ್ತ್ಂಡಲ ತುಳುವೆರೆನ ಮಾತ ಬೇಡಿಕೆಲು ಈಡೇರೊಡಾಂಡ ತುಳುವೆರೆ ಸಂಘಟನೆಲು ಗಟ್ಟಿ ಮಲ್ಪೊಡು ಪಂದ್ ತುಳುವೆರ್, ದೆಹಲಿ ಕನ್ನಡಿಗ ಪತ್ರಿಕೆಲೆನ ಸಂಪಾದಕೆರಾಯಿನ ಬಾ. ಸಾಮಗ ಕರೆ ಕೊರಿಯೆರ್.
ಆರ್ ಲಕ್ಷ್ಮೀನಗರಡ್ ಸೆಪ್ಟೆಂಬರ್ 25ಗ್ ಶ್ರೀ ಸಿದ್ಧಿ ಇವೆಂಟ್ಸ್ ಸಂಸ್ಥೆ ಸುರು ಮಲ್ದಿನ ಲೇಸ್ಡ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.
ಕೇಂದ್ರ ಸರ್ಕಾರ ತುಳುಕ್ಕು ಸಂವಿಧಾನದ ಮಾನ್ಯತೆ ಕೊರೊಡು, ದೆಹಲಿ ಅತ್ತ್‌ಡ ತುಳು ಸಾಂಸ್ಕೃತಿಕ ಮ್ಯೂಸಿಯಂ ಸ್ಥಾಪನೆ ಮಲ್ಪೊಡು, ತುಳು ವಿಶ್ವವಿದ್ಯಾಲಯ ಸುರು ಮಲ್ಪೊಡು, ತುಳು ಸಿನಿಮಾ, ನಾಟಕ, ಯಕ್ಷಗಾನೊಲೆಗ್ ಸಬ್ಸಿಡಿ ಕೊರೊಡು, ಮಂಗಳೂರು-ಮುಂಬೈ ನಡುಟು ಕಡಲ್ ಪ್ರಯಾಣ ಸುರು ಮಲ್ಪೊಡು, ಬೇತೆನೇ ತುಳು ಟಿ.ವಿ. ಬೊಕ್ಕ ಆಕಾಶವಾಣಿ ಕೇಂದ್ರೊಲೆನ್ ಸುರು ಮಲ್ಪೊಡು, ವಿಶ್ವದ ಮುಖ್ಯ ನಗರೊಲೆಡ್ ತುಳು ಉತ್ಸವ ನಡಪಾವೊಡು ಪಂದ್ ಒತ್ತಾಯ ಮಲ್ತೆರ್. ಸಾಮಗೆರ್ ದೆಹಲಿಡ್ ‘ತುಳುವೆರ್’ ತುಳು ಮಾಸಪತ್ರಿಕೆ ತುಳುತ ಬುಳೆಚಿಲ್‌ಗಾದ್ ಮಸ್ತ್ ಹೋರಾಟ ಮಲ್ದಿನ ಅತ್ತಂದೆ ಚೆನ್ನೈ, ದೆಹಲಿ, ಮುಂಬೈ, ಹೈದರಾಬಾದ್, ಪಣಜಿಲೆಡ್ ಯಶಸ್ವಿಯಾದ್ ಅಖಿಲ ಭಾರತ ತುಳು ಸಮ್ಮೇಳನೊಲೆನ್ ನಡಪಾದ್ ಕೊರ್ತ್ಂಡ್ ಪಂದ್ ಪಂಡೆರ್.
ದಿವ್ಯ ಸತೀಶ್ ಬೊಕ್ಕ ಸಿದ್ಧಿ ಎಸ್. ಕಾಮತ್ ಶ್ರೀ ಕೃಷ್ಣ ಜನ್ಮಾಷ್ಟಮಿದ ಸಮಯೊಡು ವೇಷ ಪಾಡ್‌ದ್ ಒಟ್ಟು ಮಲ್ದಿನ 3.5 ಲಕ್ಷ ರೂಪಾಯಿನ್ ಬಡ ವಿದ್ಯಾರ್ಥಿಲೆಗ್, ಅಂಗವಿಕಲೆರೆಗ್, ಅರ್ಹ ಶಾಲೆಲೆಗ್ ಪಟ್ಟ್‌ದ್ ಕೊರಿಯೆರ್.
ಬರ್ಪಿನ ವರ್ಸೊಡುಲಾ ತಾನ್ ವೇಷ ಪಾಡ್‌ದ್ ದುಡ್ಡು ಒಟ್ಟು ಮಲ್ತ್‌ದ್ ಅರ್ಹರೆಗ್ ಪಟ್ಟುವೆ ಪಂದ್ ತೆರಿಪಾಯಿನ ದಿವ್ಯ ಸತೀಶ್ ಅರೆನ್ ಮಸ್ತ್ ಜನ ಗಣ್ಯೆರ್ ಅಭಿನಂದನೆ ಮಲ್ತೆರ್. ಸಮಾಜ ಸೇವಕೆ ರಕ್ಷಿತ್, ಕಲಾವಿದೆ ಅಜಯ್ ಅರೆನ್ ಸನ್ಮಾನ ಮಲ್ತೆರ್. ಪಂಚಾಯತ್ ಆಡಳಿತಾಧಿಕಾರಿ ಹೇಮಂತಕುಮಾರ್ ಗುರ್ಕಾರ್ಮೆ ವಹಿಸ್‌ದಿತ್ತೆರ್. ಪ್ರಾಂಶುಪಾಲೆರಾಯಿನ ವಿಶ್ವನಾಥ ಪರವ, ಶಿಕ್ಷಕೆರಾಯಿನ ಯಶೋಧ, ಪ್ರಭಾಕರ ಕೋಟ್ಯಾನ್, ಶರತ್ ಶೆಟ್ಟಿ ಅಭಿನಂದನೆ ಮಲ್ತೆರ್. ರಕ್ಷಿತ್, ಸಿದ್ಧಿ, ನಿತೀಶ್, ಸತೀಶ್ ಕಾಮತ್ ಪ್ರಾರ ಮಲ್ತೆರ್. ದಿವ್ಯ ಲೇಸ್ ನಡಪಾದ್ ಕೊರಿಯೆರ್. ವಿಶ್ವನಾಥ್, ಹೇಮಂತ ಕುಮಾರ್, ಯಶೋಧ ಮೊಕುಲು ಮಾತ ಇತ್ತೆರ್.
